एउटा यस्तो प्रेम!

धनी बाउकी कान्छी छोरी चिटिक्कै थी काली 
कलेज बजार गर्दा गर्दै मायाँ गाँस्न थाली। 
बाटो बिराउँछु कि भनी डराउँने गर्थें
कैलेकाहीँ सबै भुली जिस्क्याउँने गर्थें।
**
यति दर्हो पिरतीको गाँठो बाँधिएछ
ज्यान दुइटा भए पनि मुटु गाँसिएछ।
बा-आमाका आँखा छली बिहा गरियो
नाता-गोता सम्बन्धको अन्त गरियो!
**
ससुराले ज्वाँईको नाम सुन्नै नहुने
सासू भने अलिक मत्थर जस्ती देखिने।
बर्षौ पछि सासूमाको निम्तो पढियो
घरै छेउमा पुगे पछि ट्याक्सी चढियो!
**
ससुराले सबैखाले अन्तर्वार्ता लिए
लोकसेवाको जाँचभन्दा गाह्रो पारीदिए!
शहरमा घर, कार भए पछि मात्र
छोरी लिन आऊ,आज फर्क तिमी मात्र!
**
अब भने जीवनमा लक्ष्य एउटै रह्यो
मायाँ पाउन घर-कार जोड्नु पर्ने भयो!
प्रेम गर्ने प्रेमीहरु! प्रेम गर्नु पर्छ
प्रेम गर्दा धेरै कुरा ध्यान दिनु पर्छ!
**
जुलाई २७, २०१५ 

आन आर्बर, मिचिगन