म कविता किन लेख्छु?

म करीअरले शिक्षक हुँ
पढ्छु अनि पढाउँछु। 
म करिअरले वैज्ञानिक हुँ 
समिकरण लेख्छु र हल गर्न खोज्छु!
कहिले 'एटम' हेर्छु
त
कहिले ब्याक्टेरिया र डी. एन. ए. सँग खेल्छु!
तैपनि
म कहिलेकाहीं कविता लेख्छु।
**
कहिले मनको खुसी ब्यक्त गर्न लेख्छु
कहिले पीर ब्याथा पोख्न लेख्छु।
कहिले पुतलीको माया-प्रेम खोल्छु
कहिले कुरो नलुकाऊ है भनी बोल्छु
त्यसैले म कविता लेख्छु।
**
कहिले बिसंगती केलाउँदै लेख्छु
कहिले सचेतना फैलाउन लेख्छु
एन्टोन चेकोवको 'मिजरी'मा झैं
म जिन्दगीलाई व्यक्त गर्न कविता लेख्छु!
त्यसैले म कविता लेख्छु।
**
जुन १३, २०१५ 

आन आर्बर, मिचिगन