जनावरको भाषामा

एउटा बहर (तन्नेरी) र अर्को बूढो गोरुको हल (जोडी) रहेछ। खेत जोत्न बेंसी झर्दै गर्दा यी दुईलाई एउटी बूढी गाईले भेटीछन् र सोधिछन्-'कता जान लागेको बहर गोरु?' बहरले बडो जोशले छाती फुलाएर भनेछ-'खेत जोत्न जान लागेको, देखिनस्?' बूढी गाईले त्यही प्रश्न बूढो गोरुलाई पनि सोधिछन्। उसले भनेछ -'कहाँ हुनु र खै! खेत जोत्न जान लागेको नि।' दिनभर खेत जोतेर दुवै फर्किएछन्। सन्जोगले बाटोमा ती दुवैले फेरि पनि तिनै बूढी गाईको प्रश्नको सामना गर्नु परेछ! बूढी गाईले सोधी हालिछन्-'कहाँबाट आएको बहर गोरु?' उसले खुइय सुस्केरा हाल्दै भनेछ-'कहाँ हुन्थ्यो र; खेत जोतेर आएको नि!' तर गाईलाई शान दिंदै बूढो गोरुले भनेछ, 'खेत जोतेर आ'को नि बूढी, देखिनस्?'