भर्चुएल लभ र गाउँकी पुतली

मेरी प्यारी पुतली 
तिमीबाट छुटेको पनि धेरै भएछ। 
तिमीले सोच्यौ होला - 'मलाई बिर्स्यो'!
तर होइन
मैले तिमीलाई खबर नगरे पनि
बिर्सेंको चाँही छैन!

जब म शहरमा पुगें
एउटी 'सुन्दरी' फेसबूक कुमारीसँग भेट भयो।  
पहिलो भेटमै उसले भनी-
'तिमी त मेरो राजा,!
राजतन्त्र हटिसकेको देशमा,
म 'राजा' भएँ!
कति मख्ख परें, 
भूइँमा खुट्टा रहेनन्!
मैले अंग्रेजी नबुझे पनि 
उसले 'बेबी आइ लभ यू' भन्दा,
मैले आफूलाई 'हीरो' नै ठानें। 

अँ,तिमीले कहिल्यै त्यसो भनिनौ!

उसले घरमा बा-आमालाई पनि चिनाई-
'हि इज माई लेटेस्ट बोइफ्रेन्ड'!
मेरो खुशीको सीमा रहेन!

धेरै रमाइलो भयो 
घरमा पकाउनु नपर्ने,
रेष्टुरेन्टमा खाने, सिनेमा हेर्ने
सोचें-जीवन त मस्ती रहेछ!

तर कथा आज एकाएक फेरियो!
गाउँबाट ऋण गरेर ल्याएको पैसा,
तिम्रा बा-आमाले टीका लाएर दिएको दक्षीणा 
सबै सकिएछ!
खल्ती खाली भएछ!

उसले भनी-
'तिमी त कस्तो पाखे'!
'आइ डोन्ट लभ यू एनीमोर'!

म छाँगाबाट खसेजस्तै भएँ। 

मलाइ माफ गरिदिन्छ्यौ भने, 
अलिकति बाटो खर्च पठाइदिन्छयौ भने,
म चाँडै फर्किन्छु, 
फेरि कहिल्यै शहर पस्दिन!

* नयाँबर्ष बिक्रम सम्बत २०७१ को शुभकामना सहित

   आन अर्बोर, मिचिगन 

   अमेरिका