डेराको खोजी

समय धेरै बितेछ

उताको एउटा याद आयो!
डेरा खोज्दै गर्दा
यसले सताउनु सम्म सतायो!
**
डेरा खोज्दै एउटा घरमा पुगें
घरबेटी बाले सोधे-
तपाईंले बिहा गर्नुभो?
छैन मात्र के भनेको थिएँ
उनले भने-
घरभरी बढेका छोरी छन्
अविवाहितलाई त हामी डेरा दिन्नौं!
**
अर्को पटक
श्रीमती र छोरा-छोरी लिएर
डेरा खोज्न गएँ.
घरबेटीले भने-
केटाकेटीहरु रुन्छन्, कराउँछन्
बच्चाहरु भएकोलाई त कोठा दिन्नौं।
**
यताको कुरा अर्कै छ
'क्रेडिट' चेक्-जाँच गर्नु पर्छ रे!
'ब्याकग्राउन्ड' जाँच गर्नु पर्छ रे!
आम्दानीको विवरण बुझाउनु पर्छ रे!
त्यसो मात्र कहाँ हो र-
'भरपर्दो रिफरेन्स' पनि चाहिन्छ रे!
**
मेरो साथीले घर बनाएछ
अर्कोले बनेकै घर किनेछ।
मेरो भने त्यत्रो तागत छैन
फेरि एउटा डेरा खोज्दैछु!
**
मे २८, २०१५
अान आर्बर, मिचिगन